Eurodeputeti Fleckenstein dhe ambasadori Soreca zbarkojnë në zyrën e Gjonajt, kërkojnë zgjidhje të shpejta për 3 çështje

Eurodeputeti Fleckenstein dhe ambasadori Soreca zbarkojnë në zyrën e Gjonajt, kërkojnë zgjidhje të shpejta për 3 çështje

Reforma në drejtësi dhe ngritja e institucioneve të reja, lufta kundër korrupsionit, reforma në sistemin penitenciar dhe masat e reja për forcimin e sigurisë së brendshme si dhe reforma e pronës ishin temat kryesore të diskutimit gjatë një takimi zyrtar të ministres së drejtësisë, Raportuesin për Shqipërinë në Parlamentin Europian, eurodeputetin Knut Fleckenstein, dhe ambasadorin e BE-së Luigi Soreca.

Ministrja e Drejtësisë e ka njohur Raportuesin e PE me ecurinë e deritanishme të reformës në drejtësi, rezultatet e së cilës i ka konsideruar si mjaft të mira dhe është ndalur në veçanti në ecurinë e procesit për ngritjen e institucineve të reja të drejtësisë, për të cilat tha se pritet të përfundojë shumë shpejt.

Duke folur për reformën në sistemin penitenciar, ministrja Gjonaj ka evidentuar masat më të fundit të marra nga Qeveria për rritjen e sigurisë së brendshme në burgje, duke vendosur një regjim të posaçëm për të dënuarit apo të paraburgosurit që akuzohen për krim të organizuar, trafiqe të paligjshme, apo terrorizëm. Ky regjim, për të cilin ka nisur zbatimi sipas modelit Italian “41-bis”, do të bëjë të mundur parandalimin e aktivitetit kriminal që të dënuar me rrezikshmëri të lartë tentojnë të zhvillojnë nga brenda ambjenteve të burgjeve.

Reforma e pronës, ka qenë një tjetër çështje e rëndësishme e diskutuar në takim. Ministrja Gjonaj e ka informuar Fleckenstein me ndryshimet ligjore të bëra së fundmi, për riorganizimin e institucioneve të pronësisë dhe rishikimin e kuadrit ligjor.

Nga ana e tij Raportuesi i PE, Knut Fleckenstein vlerësoi përpjekjet e mëdha që janë bërë jo vetëm në Reformën në Drejtësi por edhe në proceset e tjera si lufta kundër korrupsionit, reforma e tokës dhe sistemin penitenciar. Ai kërkoi të vazhdohej në rrugën e nisur duke përshpejtuar proceset dhe shprehu gadishmërinë e plotë për të mbështetur zbatimin e reformave shtetformuese.

COMMENTS

WORDPRESS: 0