Dështon qeveria e re në Kosovë, Albin Kurti: Ja pse nuk ka marrëveshje me LDK-në dhe oferta e refuzuar

Dështon qeveria e re në Kosovë, Albin Kurti: Ja pse nuk ka marrëveshje me LDK-në dhe oferta e refuzuar

Kryetari i Lëvizjes Vetëvendosje, Albin Kurti nëpërmjet një video mesazhi në ‘Facebook’-un e tij është shprehur se në mbledhjen e Parlamentit që do të bëhet, do të shkohet pa një marrëveshje me LDK-në.

Ai ka treguar edhe ofertën që i ka bërë LDK-së më datën 23 dhe se deri mbrëmë në darkë kishin kohë që të kthenin përgjigje, gjë që sipas tij është refuzuar.

“Kisha planifikuar që sot të takoj deputetët e pakicave dhe të zhvillojmë edhe mbledhjen e jashtëzakonshëm të këshillit të Këshillit të Përgjithshëm të VV.

Mirëpo këto u pamundësuan nga refuzimi i ofertës sime për koalicionin qeverisës, duke na dërguar nesër në Kuvend pa marrëveshje qeverisëse”, thotë ndër të tjera Kurti në video.

“Dihet që Lëvizjes Vetëvendosje si parti e parë i takon kryetari i Kuvendit dhe nënkryetari i parë, LDK-së i takon nënkryetari i dytë.

Le ta bëjmë rokadën. LDK-ja merr kryetarin e Kuvendit, kurse Vetëvendosje nënkryetarin e dytë, kështu LDK-ja ka kryeparlamentarin kurse Vetëvendosje 2 nënkryetarë”, tha Kurti.

Më tej, Kurti tha në pikën e dytë të ofertës, i ka kërkuar LDK-së që ta lërë për më vonë çështjen e presidentit, por nëse ajo këmbëngul që ta zgjidhë tani, atëherë Vetëvendosjes i takon një ministri më shumë, ajo e Punëve të Brendshme.

Ai thotë se me kërkesën e LDK-së njëra nga ministritë është rikompozuar. Kurti shton më tej se edhe pse kanë kaluar 80 ditë nga zgjedhjet e 6 tetorit, Vetëvendosje ka bërë 5 lëshime, kurse LDK-ja nuk ka bërë ende asnjë.

Seanca konstituive e Palamentit të Kosovës është caktuar për datën 26 dhjetor.

Nëse në seancën e nesërme nuk konstituohet Kuvendi, atëherë LVV dhe LDK-ja do të kenë një afat të pacaktuar që të arrijnë marrëveshje, por, në rast se ato deklarojnë dështimin, atëherë Kosova mund të shkojë sërish në zgjedhje të reja të jashtëzakonshme.

Vetë Albin Kurti ka theksuar disa herë se, nëse nuk arrihet marrëveshje me LDK-në, do të shkohet sërish në zgjedhje.